ಭೋಜನನಿರತ ಸೊಪ್ಪುಕುಟುರನ ಭಾವಭಂಗಿಗಳು

ಮಲೆನಾಡಿನಲ್ಲಿ ಸೊಪ್ಪುಕುಟುರ ಎಂದು ಕರೆಯುವ ಬಾರ್ಬೆಟ್ ಹಕ್ಕಿಗಳು ನಮ್ಮ ಮನೆಯ ಸುತ್ತಮುತ್ತ ಅಸಂಖ್ಯಾತವಾಗಿವೆ. ಆದರೆ ಅವು ಕಣ್ಣಿಗೆ ಕಾಣುವುದಕ್ಕಿಂತ ಹೆಚ್ಚಾಗಿ ಕಿವಿಗೆ ಕೇಳುತ್ತಿರುತ್ತವೆ ಎಂದರೆ ಅತಿಶಯೋಕ್ತಿಯಾಗಲಾದು! ಇದಕ್ಕೆ ಕಾರಣ ಆ ಹಕ್ಕಿಗಳ ಮೈಬಣ್ಣ. ಹಸಿರುಬಣ್ಣದ ಅವು ಮರಗಳ ನಡುವೆ ಕುಳಿತರೆ ಕಾಣುವುದಾದರೂ ಹೇಗೆ? ನಮ್ಮ ಕಾಡುಗಳಲ್ಲಿ ಸದಾಕಾಲ ಕುಟುರ್, ಕುಟುರ್, ಕುಟುರ್ ಎಂದು ಆಲಾಪ ಮಾಡುತ್ತಲೇ ಇರುವ ಈ ಹಕ್ಕಿಗಳು ಮಲೆನಾಡಿನ ಅವಿಭಾಜ್ಯ ಅಂಗಗಳೆಂದರೆ ತಪ್ಪಾಗಲಾರದು. ಇವುಗಳ ಕೂಗನ್ನು ಕೇಳುತ್ತಿದ್ದರೆ ಇಡೀ ಮಲೆನಾಡಿನ ಪ್ರಕೃತಿ, ಪರಿಸರವೆಲ್ಲ ಕಣ್ಣಮುಂದೆಯೇ ಬಂದಂತಾಗುತ್ತದೆ ಎಂಬ ಕುವೆಂಪು ಅವರ ಮಾತಿನಲ್ಲಿ ಎಳ್ಳಷ್ಟೂ ಅತಿಶಯೋಕ್ತಿಯಿಲ್ಲವೆಂದು ಯಾರಿಗಾದರೂ ಅರ್ಥವಾಗುತ್ತದೆ. ನಮ್ಮ ಮನೆಯ ಪಕ್ಕದಲ್ಲಿದ್ದ ಸೀಬೆಮರದ ಮೇಲೆ ಕುಳಿತು ಹಣ್ಣು ತಿನ್ನುತ್ತಿದ್ದಾಗ ಕಣ್ಣಿಗೆ ಬಿದ್ದ ಸೊಪ್ಪುಕುಟುರದ ವಿವಿಧ ಭಾವಭಂಗಿಗಳಿವು.